戰勝唔到自己買野嘅魔鬼？Living Wallet幫幫你！

今時今日呢個車費加、食野加、買衫加、總之乜都加剩係人工唔加嘅時勢，一個唔小心、忍唔到手買左over budget嘅心頭好，分分要月尾就係杯麵、麵包同餅乾陪伴你（好似我咁T﹏T），唔想咁可以點？不如搵個識搞事嘅銀包幫你慳慳錢啦！

 

喺呢個咁邪惡嘅年代，次次同自己講「我唔買！我唔會買！」嘅天使十次有九次都比小惡魔嘅一句「買埋呢個啦，最多出少啲街食飯囉！」反擊，當你睇完呢場天使同惡魔嘅大戰之後，通常都發現心頭好已經拎住左喺手！「Living Wallet」團隊就係要改變大家呢個壞習慣，由你個銀包落手！點解？因為亂洗錢唔係你嘅錯，係你個銀包唔同你睇實啲錢姐～

其實大家望到呢個銀包，都見到佢同普通嘅銀包最大不同之處係多左四個轆，呢個就係佢嘅幫你慳錢第一招，當你用埋手機Apps「Zaim」計住自己今個月洗幾多錢嘅時候，一洗得太多，呢個銀包真係用走佬唔比你捉，提醒你唔好亂洗錢架！

咁當然啦，一個銀包咁細個點跑都快極有限，你有心捉就一定捉到佢架喎，咁點算好？「Living Wallet」就當然有第二招啦，當你強行打開個銀包果陣，佢會叫「救命丫！」「唔好！」「放開我丫！」等等嘅字眼等你清醒啲！

有時啲小惡魔太過強大，連你都會不自覺咁同個銀包講：「嘿嘿，你叫破喉嚨都唔會有人救你架啦！」，咁點算？個銀包話明幫你慳錢，當然仲有第三招啦！呢個銀包可以比你預先set好緊急聯絡人個電話，有咩用？你喺佢叫到喊都仲想拎錢嘅時候，佢會send message比你嘅緊急聯絡人，到時會點？阿爸阿媽、老公老婆一齊打黎訓問你！阻止你！煩爆你！制裁你！（到時你叫破喉嚨都冇人救到你架啦！嘿嘿嘿…）

其實呢個銀包都係一番好意想你慳番啲錢姐，都係放下銀包，立地儲錢吧啦！

 

Comments

comments

Powered by Facebook Comments