新增兩大功能 Instagram玩埋直播！

好嘢！以後除咗Youtube、Facebook同Snapchat，連Instagram都有得玩直播！Instagram宣布咗嚟緊會新增兩項功能，包括Instagram Stories直播影片功能及Instagram Direct閱後即焚相片及影片功能，非常令人期待！

喺未來幾星期內，Instagram將會全球推出Instagram Stories直播影片功能，只要喺主頁面向右滑動開啟相機，再簡單按個「開始直播」制，就能夠立即展開長達一個鐘頭嘅直播，而且仲會即時發通知畀你嘅朋友及追蹤對象，叫埋佢哋一齊睇。而直播期間，用戶更可以喺影片下面新增留言，又或者關閉留言功能，直播完之後，影片就會隨即被刪除。另外，用戶亦可以喺Explore搜索到最新嘅Stories直播影片。

此外，Instagram Direct亦都陸續作出咗更新，除咗保留原有嘅即時訊息傳送，更會加入更多影像功能，只要喺Instagram開啟相機拍下照片或視頻，再透過箭頭鍵傳送至指定對象，呢啲影像就會喺對方睇到之後自動刪除，因為唔會留底記錄，所以就算Send錯畀人都唔洗驚。如果對方想重播或者CAP圖，用戶亦都會收到通知。不論係公開抑或私人帳戶，用戶只能傳送閱後即焚嘅照片及影片畀佢嘅追蹤對象。

Comments

comments

Powered by Facebook Comments