賀年利是封大集合!邊款最潮?最講究?

賀年利是封大集合!邊款最潮?最講究?

新年最緊要利利是是,有利是收大家就最開心!近期,各大商場已經陸續推出自家設計嘅利是封,小編搜羅咗當中幾款,同大家比併一吓,睇吓邊款最靚、最值得換!

red_pocket02

今個新春,Fashion Walk將招福貓同傳統12生肖結合,設計出一系列華麗又型格嘅利是封,構圖精美而且色彩繽紛,極之搶眼!一套13款,除咗有齊最基本嘅12生肖圖案之外,另推出雞年特別版, 潮人又點可以唔搶?

由即日起,顧客只需要喺商場消費滿HK$1,000,即可換領型過雞年利是封套裝乙套。

red_pocket04

荃灣千色匯及元朗千色匯搵嚟林皮、積美娜及畢奇等多位本地插畫師,以牡丹、桃花、蘭花、開運竹及銀柳五種花卉作為主題,設計出六款充滿藝術風格及個人特色嘅手繪利是封,有別於傳統嘅老套款式。

於即日至1月27日期內,憑商場消費滿HK$800,即可換領由本地插畫師所設計嘅六款利是封連限定利是袋。

red_pocket07

red_pocket08

今年朗豪坊搞搞新意思,設計咗「喜雀耍樂十三么利是封」,以新年必玩嘅「麻雀」作為靈感,創新得嚟又幾盞鬼,當中用咗時尚菱形圖案,再配搭孔雀绿及寶石紫兩種底色設計而成,隨利是封更附上「十三么喜雀貼紙」,等大家可以發揮創意,砌副靚牌送畀親朋戚友,氹到佢哋笑到見牙唔見眼!

於1月13至27日期間,喺商場消費滿HK$500即可免費換領「喜雀耍樂十三么利是封」乙套(6個)及「喜雀遊樂園」遊戲卡乙張。

red_pocket11

red_pocket10

red_pocket12

利是封袋住嘅唔只係錢,原來仲可以係心意!新城市廣場就諗到一款非常之有心思嘅設計,親友能夠憑住利是封上嘅QR Code貼紙,透過手機螢幕所投射出嘅360度虛擬立體影像,睇到由你真人演繹嘅新年祝賀,過時過節,特別令人覺得窩心。

凡消費滿HK$1500,即可換領「花語祝福」利是封尊貴版乙套(8個利是封及8塊Hologram投影膠片),更可即場免費錄製Hologram祝賀短片向親友拜年。

red_pocket06

嚟緊係雞年,又點少得用「雞」做主題嘅利是封?始創中心推出嘅「金雞納福」利是封,主角就係一隻勁有氣勢嘅公雞,象徵朝氣勃勃、鴻運當頭,主要以幾何圖案設計而成,而且用咗獨特嘅銀膜燙印技術,營造出幻彩及閃爍嘅視覺效果,氣派非凡。

於2017 年1月10日至27日期間,Fun享卡會員憑1,500 積分或顧客消費滿HK$200,即可免費換領「金雞納福」利是封乙包。

red_pocket03

雞全部都係雞!新鴻基地產旗下三大商場包括新都會廣場、荃灣廣場及新達廣場均推出用「雞」做噱頭嘅「賀年全家福」利是封,以公雞爸爸、母雞媽媽及五隻小雞做代表,一家大細同大家拜年,夠晒溫馨,而主色方面則採用螢光紫色及紅色,寓意新一年大紅大紫,金銀滿屋!

凡於即日至1月27日推廣期內,喺以上商場憑電子消費滿HK$500,即可換領「賀年全家福」利是封一套,消費滿$1,000可換領兩套,如此類推,每組發票最多可換領三套。

red_pocket01

YOHO MALL推出嘅「福願迎新歲」利是封相對較為傳統,但造型就極之精美,當中運用咗流線型嘅立體設計,並以燙金及壓印浮凸嘅印刷技術,把象徵吉祥嘅代表物生動地呈現出嚟,一式四款,寓意「吉星高照」、「龍馬精神」、「花團錦簇」及「年年有餘」。

由即日起,只要憑電子貨幣消費滿HK$500,即可免費換領一式四款嘅「福願迎新歲」立體利是封一套(共八個) ,每組發票最多可換領三套。

Comments

comments

Powered by Facebook Comments