PUFF.HK 流行食玩樂資訊媒體
經過之前手機爆炸一役，大家似乎對Samsung手機失去咗唔少信心，所以今年廠商都唔敢咁進取，只係推出講求實際嘅中階機Galaxy C9 Pro，6吋大芒+6GB RAM，唔知呢款新機又救唔救到亡呢？
可能因為上年嘅爆炸風波鬧得太大，所以Samsung喺2017年嘅春季發布會未有第一時間推出全新旗艦手機，改為以穩打穩紮嘅Galaxy C9 Pro作為本年度嘅頭炮。中階機好難令人期待佢有咩特別功能，不過講到性能方面，呢部C9 Pro絕對係物超所值！金屬機身基本上係走唔甩，再加上纖薄輕巧嘅設計，手感十足。新機更配備6吋FHD Super AMOLED大芒及兩個立體聲喇叭，提供UHQA超高音質，靚聲加靚畫，煲劇睇戲一流，講笑咁講，C9 Pro可能真係為一班「師奶」而設！
另外，手機最巴閉係支援6GB RAM，配合埋1.95GHz八核心Snapdragon 653處理器，運作起嚟又快又流暢。至於拍攝功能亦都唔輸蝕，前後鏡頭均有1600萬像素及F1.9大光圈，自拍鏡頭亦內置咗實時美圖功能，可以做到調節膚色、瘦臉及大眼效果，自拍嗰陣又點可以少咗佢？
金色及粉紅金版本現已有售，另有黑色款將於1月20號推出，售價為HK$3,998。
Comments
Powered by Facebook Comments
