抺茶味杯麵、可樂味薯片 嚟齊晒7-Eleven！

7-Eleven定時定候都會有新品推出，今期最搶手就有日本好hit嘅櫻花版可口可樂同合味道抺茶味杯麵，想知仲有咩係唔可以錯過，咁就要睇吓小編嘅推介喇！

1. 可口可樂櫻花特別版

又到咗櫻花嘅季節！早前日本推出咗櫻花限定版可口可樂，包裝上嘅櫻花圖案非常吸引，令唔少人都為之瘋狂。而7-Eleven亦都第一時間將呢款飲品引入咗嚟香港，大家唔使專登飛去日本買。價錢為HK$20，數量有限，售完即止，手快有手慢冇。產品喺指定7-Eleven有售，為免撲空，去之前記得check清楚地點。

2. Calbee可樂味及海鹽雲呢拿雪糕味薯片

最近卡樂B推出咗兩款全新口味嘅薯片，包括可樂味及海鹽雲呢拿雪糕味，宜家喺7-11已經搵得到！聽個名又甜又鹹咁，到底好唔好味？小編親身試過可樂味嗰款，打開包裝之後，的確聞到好大陣可樂糖味，食落有少少甜，但整體上味道偏淡，口味嘅嘢見人見智。

不過包裝後面有教大家將兩款唔同味道嘅薯片夾埋一齊食，話會有ice cream soda嘅效果，講到咁神奇，試吓無妨！優惠價HK$18兩包。

3. 合味道抺茶海鮮味

除咗櫻花限定版可樂之外，有另一款好多人爭住想試嘅食品同樣登陸咗香港7-Eleven，佢就係合味道抺茶海鮮味杯麵。日清首次推出青色嘅麵條，配埋淡淡嘅抺茶味湯底，雖然味道唔知好唔好食，但就好有新鮮感，身為抺茶控嘅你一定要試！

4.  雀巢曲奇忌廉味甜筒

雀巢甜筒又有新口味！今次係令人難以抗拒嘅曲奇忌廉味，你話點忍到口？就算減緊肥都一於食咗先講！宜家7-Eleven優惠價HK$19兩枝。

圖片來源：7-Eleven Facebook

Comments

comments

Powered by Facebook Comments