PUFF.HK 流行食玩樂資訊媒體
全港唯一一個超馬比賽「扶輪香港超級馬拉松」又返嚟喇！今年賽事有別於往年，破天荒新增「六小時耐力賽」，並邀請到中國內地、韓國、台灣等地嘅國際頂尖長跑好手參與。一齊聽下過來人有咩分享。
日前，大會舉行活動發布會，上屆男女子賽事總冠軍黃暐璁及馮靜恩都喺席上。
「扶輪香港超級馬拉松」今年已經嚟到第四屆，每年都會見到黃暐璁嘅蹤影，到底呢個比賽有咩咁吸引？「比賽要喺龍和道轉25圈，除咗要上落斜100次之外，每次轉彎都需要額外體力，係一個好有挑戰性嘅項目。過往我都只係練半馬拉松，喺耐力唔喺好夠嘅情況下參賽，所以挑戰性好大。」
跑過「扶輪香港超級馬拉松」嘅朋友都知，最攞命就係龍和道嗰條「亡命斜」，真係好嘥體力，就算冧過幾年莊嘅璁仔亦都坦言感到吃力，「頭20圈落斜時未有太大感覺，當去到跑手俗稱「撞牆」嘅情況，身體開始支持唔住，速度會慢好多，好似拉車一樣，嗰陣時跑斜路，體會好深，本身好短嘅路程，但感覺好長。跑到23圈嘅時候，更加好似地獄咁難行。」不過當佢衝過終點嘅一剎那，嗰種滿足感係難以形容。
對於大會今年邀請咗唔同地方嘅國際級人馬落場，璁仔似乎未有擔心冠軍寶座受到威脅，反而表示非常歡迎，認為有更加多高水平跑手參與，可以激發出更好嘅表現，令整個比賽嘅水平都得以提升。
上屆首次出賽便嬴得女子全場總冠軍嘅馮靜恩，其實無諗過可以得獎，「我跑長跑嘅經驗好短，跑咗4、5年全馬比賽，我覺得香港好缺乏50公里嘅路賽，扶輪香港超級馬拉松係唯一一個，所以想挑戰一下，志在參與，當時無太多準備，只係希望順利完成賽事，好意外自己有幸獲得冠軍，對我嚟講係一個肯定，亦希望自己可以成為囝囝嘅榜樣。」
大忙人馮靜恩平日又要返工又要照顧家庭，仲要抽時間預備比賽，係點樣同時兼顧呢幾方面？佢寧願選擇瞓少啲，「我會適當分配好時間，盡量安排喺上班之前、一朝早就練跑，放工之後就可以擺多啲時間喺屋企，間唔中亦都會邀請佢哋同我一齊跑，當係Family Day。」所以無時間做運動只係一個藉口！
已肓有一個15歲及一個11歲小朋友嘅佢，話唔會刻意培訓子女成為跑手，但期望佢哋可以多做運動，因為健康係最重要，亦希望自己能夠以身作則，將運動嘅氣氛帶到去家庭當中，把運動變成生活嘅一部分。
扶輪香港超級馬拉松2018
日期：2018年3月4日
起跑時間：上午7:30
起點及終點：中環龍和道
賽事詳情可到www.rotaryhkum.com或FB：Rotary HK Ultramarathon查閱。
Comments
Powered by Facebook Comments
