紐約人氣漢堡店襲港！Shake Shack頭三甲必點嘅漢堡係？

等到頸都長，說好的紐約人氣漢堡店Shake Shack終於登陸香港，位於中環IFC嘅分店喺前日正式開張。頭三甲必點嘅漢堡係邊幾款？當中有冇隱藏嘅邪惡甜品？想知就睇食評啦！

ShackBurger(左)、Shroom Burger(右)及Chick’nShack(中)

話晒Shake Shack係嚟自紐約，當然要試吓佢哋最傳統嘅美式口味－招牌ShackBurger。牛肉一啲都唔乾身，而且好重牛肉味，配上半融芝士及特製嘅ShackSauce，令人非常滿足。

至於唔食肉嘅朋友，可以揀Shroom Burger。原隻意式大啡菇經炸過之後，外層脆口，而內裡仍然juicy，咬開中間更有芝士流出，甚有驚喜。大家記得要趁熱食，如果唔係就無咗流心嘅效果。

另一款雞肉漢堡Chick’nShack亦都頗有人氣，炸雞扒夠厚身又夠脆，配上酸青瓜，十分醒胃。建議加埋辣醬一齊食，可以提升味道。

三款漢堡當中，首推ShackBurger，其次係Shroom Burger。

飲品方面，手工啤ShackMeister Ale口感清爽，能夠解膩，搭配漢堡一絕。而奶茶奶昔Milk Tea Shakes得香港先至有，質地比較濃稠，可惜奶茶味唔算太突出。

 
Shake Shack除咗漢堡之外，必食嘅仲有佢哋超邪惡嘅甜品Shack Attack，朱古力味軟雪糕＋朱古力布朗尼＋大大塊嘅朱古力碎，每一啖都充滿濃濃嘅朱古力味，朱古力控非試不可！另有三款限定雪糕，包括HK Style、The Heart & Tart of Central及That’s My Jam。

Shake Shack
地址：中環金融街8號國際金融中心商場四樓平台4018號舖
營業時間：星期一至日 11am－11pm

 

Comments

comments

Powered by Facebook Comments