智能手機工作坊 活到老學到老

老就等於同時代脫節？其實唔少長者對新事物都好有興趣，如果有機會，佢哋都希望可以學以致用，就好似噚日出席智能手機工作坊嘅一班老人家咁！

早前6 green mobile同救世軍合作，搞咗個智能手機嘅回收活動，反應非常熱烈，短短時間已經收集到近二百部嘅手機。二手手機經6 green mobile進行維修及翻新之後，會捐贈畀社會上有需要嘅人士，包括經濟上有困難嘅露宿者及老無所依嘅長者，等佢哋可以加強同外界嘅連繫。

噚日，6 green mobile就聯同救世軍舉行咗一場工作坊，親自將呢批手機送到去老人家嘅手上，並教佢哋點樣使用手機。一班公公婆婆難得遇到今次咁好嘅機會，都表現得興致勃勃。

72歲嘅伍伯伯係其中一位受惠者，獨居咗十幾年，未曾結過婚，但生活不愁寂寞，閒時會約親戚飲茶，又會逛吓公園或者到社區中心同朋友聯宜。伯伯一向只靠屋企嘅家居電話同親朋戚友聯絡，所以佢好希望能夠擁有一部智能手機，等佢出街搵朋友嗰陣都可以方便啲，不過礙於經濟問題，普通一部手機動輒幾千蚊，伯伯實在難以負擔，所以市民肯主動捐出手機，呢個小小嘅幫助，對佢嘅生活嚟講已經有好大嘅影響。

當日工作坊主要教長者一啲好簡單嘅手機操作，例如點樣打電話、用WhatsApp及影相等等，方便佢哋隨時隨地同其他人聯絡。

每位長者除咗收到一部智能手機之外，仲分發到一張電話儲值咭、插頭及USB充電線，等佢哋返到屋企都繼續有得用手機。

唔少老人家攞到部手機之後，不停拎住嚟研究，似乎大家對智能手機都感到好好奇。

公公婆婆一遇到問題，都好主動去發問，非常踴躍。

唔好睇少一班老人家上咗年紀，其實佢哋好精伶，學嘢好快上手，而且仲活學活用。

見到一班婆婆笑得咁開心，就知道佢哋一定好enjoy今次嘅活動！

救世軍過往都有搞過類似嘅長者手機班，佢哋反映其實唔少老人家都好恨有智能手機，而且好願意去學習，雖然有一定困難，可能連個制都唔識撳，要慢慢摸索，但只要肯耐心教導佢哋，佢哋都可以好叻，宜家有好多老友記學識咗之後，都會同社區中心嘅姑娘分享用手機影到嘅相，甚至有自己嘅WhatsApp群組，所以作為身邊人更應該多啲關心家中長者嘅需要，佢哋並唔係我哋想像中咁無用。

Comments

comments

Powered by Facebook Comments