Shake Shake薯條、三文魚堡、朱古力批邊樣最伏？

Shake Shake薯條又返嚟喇，而且今次仲有新口味！噚日麥當勞一口氣推出咗幾款冬日限定美食，包括好令人期待嘅朱古力批、北海道三文魚堡，以及印度香料雞翼等，到底邊樣伏，邊樣唔伏？宜家就等小編話你知！

正所謂「我不入地獄，誰入地獄」，所以小編決定身先士卒，幫大家試吓呢幾款麥當勞新出嘅限定食品，睇吓到底好唔好味，值唔值一試！

第一樣要試嘅，當然係Shake Shake薯條啦，話晒每次都係例牌必食，而且今次仲新推出咗黑松露味，齋聽個名已經覺得成件事高級咗，唔知味道又會係點呢？

一打開包粉，勁大陣黑松露味湧晒出嚟，擋都擋唔住，小編唔小心吸咗兩啖都忍唔住咳咗幾吓，聞落雖然好香，不過食落又唔係好覺得有黑松露嘅味道，勉強叫做有少少啦，至於鹹味都算幾重吓，啱晒鍾意食濃味野嘅人！

咁多樣野之中，小編自己最期待就係呢款朱古力批，因為鍾意食甜野嘛，我諗好多人都同我一樣，最有衝動試佢！

出面塊皮同一般蘋果批塊皮一樣，而裡面就裝滿晒朱古力醬，甜度啱啱好，唔會話甜到漏，不過朱古力醬就有啲「結」，所以大家唔需要期待佢會有咩流心效果，但小編覺得鍾意食朱古力嘅朋友，依然值得一試！

你睇吓！就算將個批倒轉，裡面啲朱古力醬都無流到出嚟

至於另一款北海道三文魚堡叫做不過不失，啲料唔算話好豐富，除咗塊炸三文魚之外，仲有生菜、洋蔥同啲醬汁。味道方面其實唔差，個汁酸得嚟帶有少少微辣，同三文魚幾夾，不過就略嫌塊三文魚太過薄，無嘜肉食，好似食嚟食去都淨係食緊個包咁，加上裡面啲洋蔥都幾搶味，所以整體嚟講唔算好有驚喜，就算唔食都會覺得可惜！

嚟到最後一款印度香料雞翼，聞得出佢有陣印度咖哩嘅香味，不過唔知點解愈食愈鹹，食完條脷仲好似有層野喺上面，味精極重，食咗一隻已經頂唔順要飲野，我個人覺得係伏，大家可以慳番啲錢，唔洗試！

comments

PUFF.HK 流行食玩樂資訊媒體