PUFF.HK 流行食玩樂資訊媒體
機會嚟喇，百獸王Fans！由即日至1月24號，BU會喺MegaBox嘅Comic Park & Café舉行「百獸王展覽」，除咗重頭戲百獸王超合金Figure之外，現場仲有多款由日本運嚟嘅珍貴展品，連黑膠碟都有，真係估你唔到！
今次展覽嘅主角係呢款百獸王超合金Figure，高約27cm，拎上手好有份量，最特別係佢啲手手腳腳可以拆開，變返做五隻獅子，無論「百獸王」Fans定Figure迷，相信都會好想要返隻！
其實唔淨止得個睇字，大家只要喺場內購買任何產品，另加HKD1,680就可以換到百獸王Figure嘅合金版或者彩色版一隻，數量有限，換完即止。
成個展覽又點會得Figure而無其他嘢睇咁悶呢？另外仲有一堆特登喺日本搜羅返嚟嘅「百獸王」非賣品，當中好多都係有返咁上吓歷史，喺出面已經好難再搵到，大家真係要趁呢次機會望多幾眼！
有邊個會諗到…原來「百獸王」喺1981年出過兩隻黑膠碟！裡面收錄咗由水木一郎及蟋蟀’73主唱嘅片頭及片尾曲，係唔少Fans嘅經典回憶。
你見到嘅「百獸王」卡紙堅係當年日本士多賣緊幾十円嗰款，因為停咗產，所以非常珍貴。最貴嗰張喺網上已經被人炒到高達幾十萬円，不過宜家唔洗畀錢都可以睇到！
日本人好鍾意玩嘅紙牌遊戲都曾經用過「百獸王」做主題。
1981年BANDAI推出咗呢款百獸王模型，當年嘅手工一啲都唔差，不過就要靠自己逐一幫啲配件上色。
另有Q版大頭造型嘅百獸王搪膠手辦展品，十分之的骰！
除咗上述非賣品之外，現場亦都設有Pop-up Store，出售多款為展覽而設嘅精品包括T-Shirt、文具、杯、Cushion、電話殼及外置充電器等，等大家買餐飽。
逛完Pop-up Store可以去大型展板區到影相留念，順便打埋卡，仲有唔好錯過喺「百獸王彩虹池」嬴取禮品嘅機會！
走之前記得試埋Comic Park & Café提供嘅「百獸の王者特飲」（HK$38/一杯），期間限定！
「百獸王」展覽及Pop-up Store
日期：即日起至 1 月 24 日（星期二）
時間：10:00am – 10:00pm
地點：九龍灣宏照道38號MegaBox 9樓L9-23
免費入場
Comments
Powered by Facebook Comments
