《欠債要靠賭博來還》體驗賭仔三更貧五更富！

賭仔三更貧五更富，呢一秒仲食緊白粥，下一秒可能住大屋。正所謂有賭未為輸，好彩嬴到就繼續搏，萬一輸咗就推個老婆出嚟撲(撲水)。最近有隻手機Game叫《欠債要靠賭博來還》，正正就係畀你體驗一吓賭徒嘅生活。

遊戲一開始，作為賭仔嘅你好成功咁爭落周身債，不過呢個時候你冇打算搵安信兄弟拆掂佢，亦冇諗過正正經經打份工，因為你深信啲錢喺邊到唔見就要喺邊到搵返。唔賭唔知時運高，有時手氣好，賭場馬、玩鋪老虎機、買吓獎券，咁就袋走人哋幾個月嘅人工，買得多嬴得多，盡地一鋪，隨時由細屋搬大屋。

就算一個唔好彩輸清光，輸到淨番條底褲，都仲可以推個老婆出嚟打工幫你還住啲息，然後自己依舊馬照跑、女照媾，繼續有錢唔還，收數佬成日上門喊打喊殺，呢種好似坐過山車嘅生活你真係頂得順？最後如果你發覺玩呢隻game玩到上晒癮，建議你打呢個電話號碼：2426 6262（戒賭熱線）。

Comments

comments

Powered by Facebook Comments