搶食招牌法式吐司！表參道BREAD, ESPRESSO &襲港

嚟自東京表參道嘅人氣麵包咖啡店BREAD, ESPRESSO &正式登陸香港！除咗每日限量發售嘅「招牌法式吐司」係必食之外，仲有多款手工麵包輪流供應，以後隨時都可以食到充滿日本味道嘅麵包！

喺東京及大阪一共有8間分店嘅BREAD, ESPRESSO &，最近嚟咗香港！

呢間經常喺表參道大排長龍嘅人氣麵包咖啡店，首推當然係佢哋最出名嘅「招牌法式吐司」。唔好睇少呢塊厚多士好似平平無奇，實情係要經過一輪工夫先至送到去客人嘅面前，吐司會預先浸滿以日本雞蛋、鮮奶、糖及法國忌廉製成嘅蛋漿，然後冷藏24個鐘，等到落order嘅時候，再用鐵板烘焗而成。吐司外層金黃香脆，內裡卻非常軟滑，配埋清甜嘅意大利槐花蜂蜜，實在令人無法抗拒！不過要留意呢款吐司只作有限度推出，每日限量30份於下午3點供應，睇嚟就算喺香港食都要同人爭崩頭！

除咗「招牌法式吐司」之外，店舖每日更有多達30款嘅手工麵包輪住供應，全部都係採用日本上乘嘅材料同跟足日本嘅做法去製作，包證將麵包嘅原味帶到嚟香港。另外，店舖亦都好注重咖啡嘅出品，由專業咖啡師以香港烘焙嘅巴西、埃塞俄比亞及印尼嘅公平貿易咖啡豆，沖製獨家調配嘅House Blend Coffee，味道香濃，送麵包一流！

BREAD, ESPRESSO &
地址：尖沙咀漆咸道南115號地下
營業時間：星期一至日08:00-20:00
電話：2320 1228

Comments

comments

Powered by Facebook Comments