PUFF.HK 流行食玩樂資訊媒體
《中國新歌聲》中國香港賽區選拔戰進行得如火如荼，話咁快已經完成咗最後一場複賽，5位強者順利誕生，嚟緊就會迎戰半準決賽，戰況去到百熱化階段，唔知咁多位評審又睇好邊位學員？
經過一個多月嘅時間，《中國新歌聲》中國香港賽區海選終於殺入最後直路，第三次複賽亦都喺5月28日圓滿舉行。
當日嘅評審分別有煒堅、Dr. Steve、方樹梁及黎明詩。
21位參加者當中，5位成功晉身6月4日嘅《半準決賽》，邊個最終可以代表香港區出賽？結果好快就會知道！
出線名單如下：
1. (10) 范浩賢 <阿飛的小蝴蝶>
2. (12) 鄧鎧童 <罪惡感>
3. (13）李浩森 <普通朋友>
4. (14) 李昊嘉 <李香蘭>
5. (21) 呂喬茵 <I will always love you>
評審之一嘅著名導演及跨媒體創作人煒堅，由初賽到宜家都一路觀察住學員嘅表現，「感受好深，見到學員嘅水準有好明顯嘅進步，好開心」。佢亦覺得呢次比賽對參賽者嚟講，能夠同到咁專業嘅Live Band合作，係好難得嘅機會。
睇咗咁多場賽事，煒堅對其中一位女學員嘅表現尤其深刻，「張學友嘅歌本身唔易唱，但佢Carry得到，而且唱到另一種風格」。但畢竟國內嘅水準超高，佢都替香港嘅參賽者擔心。
講到今次比賽嘅大熱人選，另一位評審，音樂監製方樹梁就點名大讚鄧鎧童，「真係聽到好感動，令人打冷震，起晒雞皮。」，「除咗感情之外，技巧方面亦兼顧得到，另外同Band之間嘅交流都好緊要，佢有齊晒以上幾點」。
內地流行飆高音，要突圍而出，Dr. Steve都有唔少建議畀香港學員，「把聲要夠特別，特別到13億人當中都搵唔到，再加埋自己個人嘅style同唱功，當你嘅演繹好過原唱者，甚至變成原唱者，只要好聽到入心入肺，佢哋就會鍾意」。
Comments
Powered by Facebook Comments
