為慈善出盡力！蝦頭首次公開彈琴

社會上有唔少非牟利組織為小動物出心出力，其中一個係「毛孩守護者」。佢哋早前聯同樂•演奏學院搞咗場音樂表演，藉此宣揚救助動物嘅訊息。嘉賓之一嘅楊詩敏(蝦頭)更為慈善獻出自己嘅第一次，喺公開活動表演彈琴。

「毛孩守護者慈善音樂表演」於上星期六(28/10)喺愉景新城舉行，藝人楊詩敏(蝦頭)有份出席。

「毛孩守護者」成立四年以嚟，拯救過無數流浪動物，但面對某啲情況仍然有心無力，創辦人Kent慨嘆：「最慘嘅未必係流浪動物，因為起碼佢哋識得自己搵地方匿、識得自己搵野食，反而有主人養嘅寵物，而主人又唔愛惜佢哋先係最可憐，任由佢哋自生自滅，有病又唔帶佢哋睇醫生，就算義工想插手都無辦法。」

講到同動物嘅相處之道，有養開寵物嘅蝦頭就話：「我當自己嘅小動物係小朋友一樣，要畀耐性，唔好一見到佢哋做錯野就打打鬧鬧，我會用人話同佢哋溝通，我知佢哋係會聽得到。」佢又呼籲大眾切勿輕易棄養寵物，如果想養小動物嘅話，應該支持領養。

另外，佢大讚「毛孩守護者」係一間好有心嘅機構，「只要有流浪動物需要幫助，佢哋無論遇到咩困難，即使係八號風球，都會去拯救，而且佢哋設有自己嘅診所，受咗傷嘅小動物可以喺裡面得到好好嘅照顧及治療。」

今次活動透過唔同形式嘅音樂，向下一代灌輸愛護動物嘅重要性，同時亦希望佢哋可以感受音樂所帶嚟嘅樂趣。

蝦頭首次喺公開場合表演彈琴，對佢嚟講係一個好新鮮嘅嘗試，「做自己鍾意嘅野係好快樂，而能夠將呢種快樂分享埋畀其他人係一個更加正嘅過程。」自細學琴嘅佢，學咗大約6、7年，後來放棄咗，事隔多年後又重拾返起興趣，再次學習彈鋼琴。蝦頭鼓勵大家不妨花啲時間做自己感興趣嘅事，因為當中所獲得嘅快樂係由心而發，嗰種感覺係好實在。