PUFF.HK 流行食玩樂資訊媒體
有乜野比鬼更可怕？《鬼網》係一套以本土為題材嘅港產鬼片，分成3個單元故事，由唔同導演操刀，反映畸形嘅社會現象及被扭曲咗嘅價值觀。
每個人對恐怖嘅定義都唔一樣，導演黃國強心目中嘅港式恐怖又係點？
生活喺香港，本身就係一件好得人驚嘅事！「有時睇新聞見到一家大細住喺只得百幾呎嘅劏房裡面，間屋仲要擺滿晒野，小朋友只能夠坐喺張床，搵塊木板放喺大髀上做功課，其實咁樣係唔健康嘅生活，環顧全亞洲，香港呢種住屋情況係好畸形。」黃國強感嘆香港地生活逼人。
電影其中一個故仔《好鄰居》就係用咗呢個現況為藍圖，講述少女搬入工廈劏房，要同鬼爭地方住。
主角之一嘅郭奕芯，喊苦話「真係連做鬼都無位，香港嘅房屋問題真係好嚴重，自己搬咗出嚟住之後，都覺得租金太貴，其實唔只租金貴，出街買件靚啲嘅衫都好難負擔得到，所以唔單止住屋問題，成個香港都好有問題。」
另一位演員鮑康兒亦都替香港人覺得慘，認為宜家嘅工資追唔上物價，買野、住屋、食野乜都貴！做人仲慘過做鬼！
除咗題材吸引，能夠引起大家共鳴之外，呢個故事嘅導演同演員都係首次拍攝鬼片，班底好有新鮮感。
拍過《選戰》嘅黃國強由電視界跳到電影界，以往嘅經驗對佢嚟講有好有唔好，「拍開電視劇都有一段長時間，相信比一般新導演有優勝嘅地方，就係可以好快掌握拍攝流程，甚至遇到問題，都容易啲解決。」但佢亦都坦言會有較多包袱，好多時會不自覺用咗既有嘅套路去拍，需要經常反問自己會唔會仲有第二種方法。
靚女係唔係特別細膽啲？自認係膽小鬼嘅郭奕芯，表示自己平時連鬼片都唔敢睇。問到鮑康兒拍鬼片嘅時候驚唔驚？佢就話拍嘅過程唔驚，因為現場有好多人，但返到屋企就會好易亂諗野，所以為咗今次嘅拍攝，佢哋都鼓起咗好大勇氣。
全何一個演員都希望自己嘅演技可以得到認同，郭奕芯同鮑康兒都唔例外，唔想畀人感覺係「花瓶」，咁事實上又係咪得個殼？鮑康兒入行一年拍過差唔多十套劇集，「咩角色都有演過，就算係被要求唔化妝嘅角色都做過，我覺得觀眾係會睇到你有用心去演，所以又唔會擔心佢哋覺得我淨係得個樣。」
Comments
Powered by Facebook Comments
