PUFF.HK 流行食玩樂資訊媒體
早幾個月前， Bragi推出咗一隻堅係落得水嘅真無線耳機 The Dash，雖然功能齊全，不過就略嫌貴咗少少，所以噚日品牌就發表咗另一款個樣同The Dash差唔多，但價錢平一截嘅入門版耳機The Headphone，等大家有多一個選擇！
由耳機到便攜盒，The Headphone嘅外型都同The Dash似到十足十，不過因為價錢平咗成千蚊，功能方面自然唔能夠相提並論，好似上一代嘅IPX7防水規格，今次就無包到，連原本內置喺耳機嘅4GB容量亦都無埋，唔能夠再當成獨立播放器使用，但基本嘅防汗防雨水功能就完全無問題。
The Headphone同樣採用NFMI技術，聲音傳送方面依舊穩定，雖然轉咗用單一動鐵單元，但音質相差無幾，至於所使用嘅骨傳導麥克風，亦都確保咗通話清晰，而Audio Transparency功能照樣有得留低，方便大家聽歌嘅同時，可以留意埋周遭嘅聲音，防止發生意外。另外，耳機放棄咗The Dash嘅觸控面板，改為以直接得多嘅實體按鈕嚟控制歌曲嘅播放，而且續航力亦都延長咗唔少，能夠播足6小時音樂，夠晒實用，可惜今次附送嘅便攜盒無得額外幫耳機充電，無之前咁方便，但就輕身咗好多，拎出街都容易啲！
產品於12月初正式開賣，即日起可到 truewireless.hk/bragi作優先預訂，售價為HK$1,398。
查詢電話：2395 3913（LRT）
Comments
Powered by Facebook Comments
