吃得到的櫻花！「櫻の花見」主題下午茶

三月開始，又到咗櫻花盛開嘅季節，即使趕唔切飛去日本或韓國欣賞櫻花都唔使失望，因為尖沙咀珀薈酒店為大家預備咗「櫻の花見」主題下午茶，有多款櫻花甜品及日式小食供應，同樣令人賞心悅目！

尖沙咀珀薈酒店嘅Uptop Bistro and Bar最近推出以櫻花為主題嘅下午茶，提供一系列特色甜品及滋味鹹點，當中除咗有櫻花口味嘅曲奇同馬卡龍之外，亦都有傳統嘅日式和菓子、水信玄餅及士多啤梨卷蛋，款款都咁精緻，真係唔知食邊件先至好！另有用櫻花及玫瑰糖漿調配而成，並畫上櫻花圖案嘅Latte都係咁令人充滿期待。

至於鹹點方面亦都唔輸蝕，其中一款「日式鰻魚春卷」以香脆嘅春卷皮包住肥美照燒鰻魚，味道濃郁，而且外脆內軟，大家一定要試吓！仲有「櫻花蝦冷麵」、「甜蝦迷你手卷」、「醃三文魚配蟹肉沙律」、「吞拿魚他他配青芥辣蛋黃醬」、「吉列炸蝦」及「紫薯可樂餅」等多款小食，讓大家大飽口福！

「櫻の花見」主題下午茶
地址：尖沙咀漆咸道南117號珀薈酒店19樓（Uptop Bistro and Bar）
價錢：星期一至五 $348/兩位；星期六、日及公眾假期 $388/兩位（另設加一服務費）
查詢電話：2117 3526

Comments

comments

Powered by Facebook Comments