【世上最萌行李篋】佢有一對識郁嘅耳仔？

打邊爐最緊要係個爐，唔洗講，咁去旅行最緊要就一定係個篋！話說最近出現咗一款巧打耳嘅貓貓行李篋，唔單止外型同顏色討好，最得人歡心嘅係佢仲有一對軟腍腍、好好挰而且摸吓會識郁嘅「貓耳仔」，唔係講笑，小編見到佢真係好心動！

呢款Fravel行李篋實在太可愛喇！就算唔係貓奴，只要你有顆少女心，你都肯定會被佢得意嘅外型吸引住。行李篋最盞鬼莫過於嗰對「貓耳仔」，只要輕輕掂一掂或者摸吓個篋，隻耳仔就會識得郁，好似真貓一樣，非常有趣！

睇真啲，原來行李篋個轆都係以貓腳嘅造型嚟設計，唯妙唯肖，加埋篋上面個心型閃燈，真係靚到唔識形容！

行李篋除咗外型夠Cute之外，喺選色方面，Sweet到爆嘅馬卡龍色系又係幾加分，幾中到少女們嘅心。如果想要特別啲，仲有其他漸變色可以選擇，就算你個人比較Cool啲，一樣有得揀，型格嘅黑色就最襯你！

行李篋尺寸只有22 x 14 x 10吋，雖然唔算大，但勝在夠輕身，當手提行李拎上機啱啱好，想趁旅行前入手，可以到kickstarter訂購，價錢由三百幾美元起。

資料來源：kickstarter / Fravel Facebook

Comments

comments

Powered by Facebook Comments