雙屏幕HTC U Ultra 玻璃機身外型煞食

雙屏幕HTC U Ultra 玻璃機身外型煞食

正當以為HTC會跌出旗艦機市場嘅時候,反而喺新一年搶先其他人一步,推出以外型取勝嘅HTC U Ultra,3D曲面玻璃機身喺唔同角度嘅光線下,會呈現出唔同顏色,非常奪目,而且仲有比較特別嘅藍寶石玻璃版本提供。

HTC U Ultra_01

第一眼望到HTC U Ultra,已經被佢煞食嘅外型吸引住,新機唔再係平時用到爛嘅金屬機身,而係改為用加入咗三軸對稱設計嘅3D曲面水漾玻璃,經光線反射之下,零舍耀眼,而從唔同角度去望,更會睇到手機有唔同顏色透出,非常之特别,淨係呢一點已經加晒分。顏色方面有四種選擇,黑、藍、白及粉紅,個人覺得藍色最吸睛。與此同時,手機亦都提供藍寶石玻璃128GB版本畀大家揀。

HTC U Ultra_03

除咗外型給力之外,U Ultra喺其他方面也有唔少新嘗試,例如喺5.7吋2K螢幕上首次加入副屏幕,能顯示訊息之餘,用戶亦都可以自訂聯絡人名單及常用嘅App,而同LG最大嘅分別在於呢個副屏幕會配合手機內建嘅HTC Sense Companion AI系統,識得根據用戶嘅習慣,自動更改聯絡人或者App嘅排序。另外,U Ultra底部設有USB Type-C 插口,而且取消咗3.5mm耳機孔,想聽歌就需要用到跟機嘅Type-C U Sonic耳機。

HTC U Ultra_02

至於相機方面,1200萬像素嘅主鏡頭具備OIS光學防手震及雷射對焦功能;前置鏡頭亦都高達1600萬像素,仲可以切換成Ultra Pixel模式,喺昏暗嘅情況下,可以大大提高感光度,從而捕捉當中嘅細節。但美中不足嘅地方係,U Ultra只配備Qualcomm Snapdragon 821處理器,而且電池容量得3000mAh,唔係幾見使。

有關U Ultra嘅發售日期及售價等詳情,待香港發布會舉行後,再作公布。

Comments

comments

Powered by Facebook Comments