KEVOLIE 2017/18秋冬時裝展 眾星雲集

婚紗及高級訂製禮服品牌KEVOLIE喺噚晚搞咗一場非常盛大嘅Fashion Show，除咗品牌創辦人之一嘅胡杏兒有份出席之外，座上客亦都可謂星光熠熠，李施樺、姚子羚、胡定欣、宣萱、胡蓓蔚、張敬軒、陳敏之、黃智雯、鄧萃雯等齊齊出席力撐杏兒。

噚晚，胡杏兒有份創立嘅KEVOLIE喺尖沙咀香港洲際酒店舉行2017/18 秋冬時裝展，活動嘉賓當然唔少得一班「胡說八道會」嘅好姊妹，李施樺、姚子羚、胡定欣、胡蓓蔚及黃智雯都有現身支持。另外，出席嘅仲有宣萱、張敬軒、陳敏之、鄧萃雯等藝人朋友，陣容十分鼎盛。

為咗隆重其事，杏兒當晚專登穿著咗由品牌設計總監姚子裕(Kev)為其度身打造嘅高貴孕婦晚裝，更表示一直以嚟都好欣賞Kev嘅設計，適逢自己懷有身孕，好高興能夠率先著上呢套咁華麗嘅晚裝，就算宜家身型有變，但依然可以展現到佢最charm嘅一面。

KEVOLIE 2017/18秋冬系列名為「永生花」”The Everlasting Blossom”，Kev同佢嘅團隊利用咗唔同嘅布料剪裁，再配合細緻嘅拼接技巧，營造出一朵又一朵永不枯萎嘅花，以表達出留住永恆美好一刻嘅概念，而當中嘅婚紗及晚裝更係由全人手一針一線縫製而成，每一件都係獨一無二。最後，喺活動結束前，杏兒興奮宣布，嚟緊十月頭，品牌將會進軍上海開分店，比自己嘅BB更快出世。

Comments

comments

Powered by Facebook Comments