PUFF.HK 流行食玩樂資訊媒體
農曆新年又就嚟到！始創中心提早向大家拜年，由今日起至2月15日期間舉行「中西傳統剪紙藝萃展」，展出超過六十幅同賀年有關嘅中國傳統剪紙珍品及色彩奪目嘅波蘭藝術剪紙，大家不妨趁呢個機會，欣賞一吓咁靚嘅傳統工藝！
為期近一個月嘅「中西傳統剪紙藝萃展」於1月10日至2月15日期間，喺始創中心舉行，當中愈六十幅嘅中、西展品分別嚟自中國大師李云俠及波蘭剪紙藝術家 Grace Bazylewski。嚟緊係雞年，主角當然唔少得以雞作為主題嘅剪紙啦！中式方面，部份展品更係首度曝光，除咗好有賀年同喜慶氣氛嘅傳統雞年圖案、新春福娃、婚嫁系列及動物花鳥系列等之外，當中仲有兩幅高難度及罕有嘅彩色剪紙—「蓮藕娃娃」及「喜得雙子」，盡顯大師級嘅功力，好值得大家一睇！
至於西式方面，作品題材以公雞、雀鳥及花卉圖案為主，色彩鮮艷眼搶，構圖精美，充分表現出波蘭剪紙藝術嘅特色。另外，為咗襯返今次展覽嘅主題，商場亦都用咗「剪紙」呢個構思嚟進行佈置，正門以「金雞富貴」作為設計，寓意金雞報喜、富貴吉祥，大堂中央唔單止懸掛咗五組金光閃爍嘅大型燈飾群，仲配襯埋「雞祥如意」、「百年之福」及「魚戲荷花」縷空剪紙嘅吊飾，非常應節！
「中西傳統剪紙藝萃展」
日期：2017年1月10日至2月15日
地點：始創中心地面大堂
「新春剪‧藝‧體驗坊」
日期： 2017 年 1 月 22 日
時間： 2:00pm–2:45pm；3:00pm–3:45pm；4:00pm–4:45pm (每節45分鐘)
地點： 始創中心地面大堂
由著名中國民間剪紙藝術大師李云俠親自示範及教授新春剪紙，顧客消費滿 HK$100即可免費參加，親身體驗剪紙藝術的樂趣。
Comments
Powered by Facebook Comments
