茶味爆發！Tea WG推情人節限定套餐

農曆新年都未到，又要開始諗定情人節點慶祝！最實際就梗係帶另一半食餐好，由2月10日起，Tea WG將會推出以茶入饌嘅情人節限定套餐，由頭盤食到落甜品，每道菜式都充滿住陣陣茶香，咁有心思嘅安排，情人一定受落。

Tea WG喺情人節前夕及當日，會為大家精心炮製情人節大餐，以品牌獨特嘅茶味配上高級食材，引發連串驚喜。頭盤有香煎煙熏鵝肝伴水煮梨及香草豆莢，搭配無花果果醬和波本香草紅茶泡沫醬汁，主菜方面則可選擇烤穀飼牛肋骨伴嫩炒香菇、姬菇和羊肚菌，再配以焦糖味噌及注入御選普洱嘅紅酒汁；或烘烤法國野生比目魚伴香脆魚皮、巴馬臣芝士馬鈴薯丸子，配玄米茶煮成嘅清湯及白蘆筍。最後仲有加入咗茶意永恆茶嘅糖漬草莓啫喱佐白巧克力香草鮮奶油，為呢一餐劃上完美句號。套餐更包括由玫瑰芬香茶調配而成嘅香檳及一壺吾愛之茶。

除咗大餐之外，情人節又點少得為摯愛送上禮物？Tea WG亦都好貼心為大家預備咗送禮三寶，包括吾愛之茶茶香馬卡龍禮盒、吾愛之茶魚子醬錫罐包裝茗茶及魅幻系列茶杯、茶壺，以供選購。

Tea WG情人節二人套餐售價為HK$ 888，2017年2月10日至2月14日期間限定，由位於圓方、太古廣場及國際金融中心嘅Tea WG沙龍與精品店提供。

Comments

comments

Powered by Facebook Comments