桃花樹下許願 祈求愛情得米

新一年，係人都想行番個大運，尤其無拖拍嘅，更加希望可以早日脫單。今個農曆年，只要嚟到YOHO MALL打造嘅「花‧願庭園」，相信一定有求必應，園內設有鳥居、風車陣、愛情太鼓廟等五大許願區，其中更有一棵巨型桃花樹，想祈求愛情得意嘅你點都要嚟沾番啲好運！

新年除咗拜年，好多人都會特登去寺廟祈福許願，今年一於畀多個選擇大家！由即日起至2月12日期間，元朗YOHO MALL I一樓中庭會化身成充滿傳統和風特色嘅「花‧願庭園」，當中嘅主角係一棵5米高嘅桃花許願樹，樹上吊住多個閃爍嘅小燈泡，加埋搶眼嘅霓虹燈飾，營造出醉人嘅浪漫氣氛。唔單止單身嘅朋友可以喺免費繪馬祈願板上求桃花，拖友們亦都可以雙雙走入桃花樹中，打卡留底甜蜜一刻。

場內仲有其餘四個許願區，包括4米高嘅大型鳥居、五彩繽紛嘅燈籠海大道、巨型風車陣及愛情太鼓廟，只要將心形祈願紙放入許願箱內，並用力敲響太鼓，就可以祝願蜜運成功，愛情長長久久，想綁住另一半，大家就要記得跟住以上嘅方法去做。

YOHO MALL  – 「花‧願庭園」
日期: 即日起2017年至2月12日
時間: 10:00am-10:00pm
地點: YOHO MALL I一樓中庭

Comments

comments

Powered by Facebook Comments