PUFF.HK 流行食玩樂資訊媒體
市面有唔少輔助大家更方便地使用智能電話自拍嘅工具，但真正稱得上自拍神器應該好似Sony KW1咁，外型出眾之餘仲要有內涵。Sony KW1係一部專門研發用黎自拍嘅相機，擁有搶眼嘅香水樽外型及多種美化相片嘅能力，目嘅就係要俘虜女士們個心啦！
自拍對大家黎講就好似反射動作咁，好多時買新電話除咗睇價錢、外型之外，必問鏡頭像素，尤其前鏡頭。自拍唔係影完就算，仲要加效果、公仔、文字，再放上社交網站同朋友仔分享，有時還需要呃「Like」呢。所以就算數碼相機像素再高、影得再清都好，無得執、又唔可以即時放上網已經比唔上手提電話。
Sony見到大家都咁鐘意自拍，而手提電話嘅鏡頭始終有限，所以出咗呢款自拍相機。同普通嘅相機唔同，KW1有一個3.3吋嘅OLED觸控螢幕，無論遠、近、定係要美化相片都有足夠畫面睇清楚。叫得做相機，像素當然有番咁上下啦！Sony採用了21mm超廣角鏡頭、f/2.0大光圈，擁有1920萬像素，仲可以180度旋轉。就算暗啲嘅環境都唔洗怕，因為鏡頭旁配有LED閃光燈，完全解決了電話前鏡頭冇閃光燈嘅問題，想點影就點影！
KW1機身旁有兩個掣，一個係開關，另一個係影相掣。有朋友會話按影相掣拍攝會容易手震，但KW1已經內置光學防手震功能架喇！當然，你亦可以設定觸屏拍攝，自由選擇。加上內置咗單聲道麥克風，拍片？都冇難啦！ 而且大小同IPhone差唔多，女士們都可以單手控制。
鍾情自拍嘅朋友都一定會美化相片，就連少少瑕疵都執走，將最好嘅一面分享比大家。KW1內置咗八個場景模式比大家使用，分別有美食、防震系統、風景、夜間、高感光度、寵物、海邊、雪地。影完之後，你亦可以再美化相片，盡求完美。KW1以外置記憶卡儲存相片，大家亦可以利用WiFi連接網絡又或者透過NFC傳送分享。
鏡頭上鑲有享華洛世奇元素，以水鑽點綴，而隨機附送水晶質感支架，配合番香水高貴優雅嘅特點，共有橙、紫、綠、白四色選擇。「KW1」取自諧音「卡哇伊」，暫定只在內地及台灣地區發行，價錢為人民幣5，199（約25，000新台幣）。相信深受女士愛戴，KW1玩得影得仲睇得，你有冇心動呀？！
http://mag.udn.com/mag/digital/storypage.jsp?f_MAIN_ID=320&f_SUB_ID=4499&f_ART_ID=531104
Comments
Powered by Facebook Comments
