PUFF.HK 流行食玩樂資訊媒體
網上流傳「港女」常犯錯誤的文章，我睇過，係錯唔哂嘅！但最錯嘅係，標籤人哋係「港女」依個Term我真係好唔同意亦唔接受！逢親女仔有D特徵你唔滿意就話人哋係「港女」，然後D男仔有咩唔夠好又話人係「狗公」、「毒撚」；而Lee D形容詞偏偏係跟據每個人心目中果把尺去改變，即係屈機，你做乜都可以係地底泥，咁樣真係缺乏學識亦無文化！唔好因為潮流講你又講，惡意「標籤」係一樣令自己品格下滑嘅行為；要話人就要中Point，咁先有道理、有質素。記住唔好狗屎垃圾都淨係識撻人「死港女」喇！
講完，入正題！
當我看到這篇攻擊女性的文章，我第一時間唔係要企出黎捍衛女性D乜，而係立刻浮現好多男女之間相處上難劃清錯對嘅矛盾。你話女人咁樣唔好咩？咁你有無諗過自己又係點？有時，當大家都淨係睇到對方有咩唔好而忽略反省自己，以致俾人飛都淨係Mark大個口得個窿，或者終日抱怨「點解我對你咁好都要走？」
(網絡圖片)
有人話「女人鍾意同朋友爆曬兩人嘅秘密」
女人係較男人能從語言上發洩內心不滿，即係搵朋友吹吓水或呻吓，基本上D火都已經落咗一半。至於男人係咪唔會講兩個人之間嘅秘密？係少D講，但係如果要呻，通常都淨係講女人有咩唔好，因為自大嘅男人通常都覺得自己0岩哂。
有人話「女人一鬧交就搵其他異性飲酒」
咁又點？男人一鬧交咪又係出咗去打波、打機、飲酒、扮應酬！球場無異性嘅…應酬無異性嘅…飲酒地方無異性嘅…所以對我黎講其實無乜分別囉！如果你事先已經唔信另一半對你忠誠，你無論去做運動定去飲酒，都觸犯出軌嫌疑架啦。
有人話「女人對你一不滿就搬出前度來比較」
女人蠢D，會攤出個肚皮俾你知佢比較緊；但男人就會收埋收埋喺個心裡面比較，然後間接用言語和行動，去操控你變成佢滿意嘅前度。
有人話「只要男友一有聚會，女人就死要跟埋去」
其實好多男人都會想參與女友嘅聚會，即使參加唔到，都會事前事後問一大堆問題「同邊個去呀？佢有無女朋友架？點解又同佢食嘅？佢有無追過你？」等等。私人空間嘅定義，係要由雙方商量、默契和共識而來，否則就會變成「我女友/男友又要一齊黎喎…」
有人話「女人要求男友幫自己拎曬所有戰利品係唔應該」
男人老狗拎幾袋嘢都要怨女人，咁屋企D粗重家務係咪男人每日自己做返先？又以為淨係男人先要付出喇…
有人話「女人一嘈交就唔聽電話」
女人嬲果時可能會唔聽電話，但男人嬲果時夠係唔講嘢、無表情、當睇你唔到啦，咪又係好乞人憎。
有人話「女人唔會講自己諗緊乜，下下要對方估中」
我自己都有Lee個部份，因為想得到強烈被寵愛嘅感覺；如果得唔到咪扭吓計，詐吓嬌囉。男人就剛剛相反，佢地好樂意講想要乜；可惜，講咗出口就唔會接受你做唔到：「我講你就要聽」，其實這很令人窒息呢，我情願你咪鬼講@@”
以上幾個典型例子你總會遇過，咁邊個0岩邊個錯？旁人永遠答不準，因為這些鎖碎而貼身的問題，確有好多由兩位主角的上文下理，前因後果去推敲；所以兩個人最終要分開定繼續一齊，只有當時人先最清楚。
第三第四者收嗲唔該當幫忙^O^
霸佔人生最多的，除了衣食住行外，就是「愛」，然後「性」！
你不談戀愛，我知道「愛」或許傷過你，那就學習怎樣的「愛」才適合自己！
你不敢談性，請不要忌諱，這比你大小二便更平常；今天你討論也不願，單靠寶貴年歷去取經，或許會更傷到自己！
MT Mabel．敢言．兩．性關係．
Facebook專頁：MT Mabel 「讚好」了解我更多~
(https://www.facebook.com/MTmabel)
~ 歡迎提出你想討論的話題，這裡有開放、健康的空間，讓我們一同好好學習 ~
Comments
Powered by Facebook Comments
