聖誕遊澳門 順道歎埋靚靚應節甜品

今個聖誕，如果Budget唔夠，近近地去澳門遊返轉都係個唔錯嘅選擇！嚟緊澳門JW萬豪酒店會同當地法式甜品店「卡夫卡」，攜手推出多款以聖誕為題嘅特色甜品，有得意雪人同聖誕鹿等唔同造型，款款都咁靚，齋係影相都影唔停！

由聽日(10/12)開始，澳門JW萬豪酒店嘅「大堂酒廊」將會提供冬日佳節Tea Set，今次酒店特意搵嚟法式甜品店「卡夫卡」合作，將佢哋嘅人氣招牌甜品重新演繹。其中一款好似聖誕波波嘅甜品名為「永恆雪花」，當中選用咗Tea WG 1837 嘅經典黑茶，再包咗層搶眼嘅橙色焦糖糖衣喺面，加埋雪花形狀嘅白朱古力片做裝飾，賣相十分吸引。

至於鍾意食抹茶甜品嘅朋友，當然唔可以錯過另一款「京都之森」，佢用上產自京都嘅宇治抹茶同小倉紅豆等食材，口味夠晒傳統地道，而且精緻嘅聖誕松樹造型亦都非常應節。另外，酒店仲設計咗4款美味鹹點，包括意大利水牛芝士拌蘆筍配黑松露醬、巴馬火腿拌大孔芝士配無花果、青瓜片拌珍珠筍配多士及車厘茄拌忌廉芝士，再配埋特選嘅Tea WG茶品，呢一餐真係夠晒滿足！下午茶供應期至到2017年1月8日，價錢為澳門幣258元兩位。

Comments

comments

Powered by Facebook Comments