Are You Ready？扶輪香港超馬2017三月開鑼

馬拉松比賽陸續有嚟！「扶輪香港超級馬拉松2017」鐵定今年3月5號舉行，50公里嘅賽事相當有挑戰性，想同頂尖跑手一同較勁，仲唔立即報名？除咗個人賽之外，仲有團隊接力賽，就算唔夠人跑，都有機會一齊參與呢項全民運動！

早前喺1月5號舉行咗發布會

由香港業餘田徑總會同國際扶輪3450地區合辦嘅「扶輪香港超級馬拉松2017」，今年已經嚟到第三屆，咁有挑戰性嘅活動當然唔好畀佢停，是次更以「超我服務 由我起動」為口號，鼓勵大眾超越自我，突破極限，並且宣揚「超我服務」、回饋社會嘅精神，好值得大家參與！

(上屆活動相片)

同往年一樣，50公里嘅超馬賽事以龍和道西行線為賽道，每圈約2公里，參賽者一共需要跑25個圈，呢項比賽唔單止講求耐力，要跑晒全場亦都好考驗大家嘅意志力。

左：黃暐璁 ，右：Ms Julie Beatty
(扶輪香港超級馬拉松2015及2016男、女子全場總冠軍)

喺上屆比賽中，黃暐璁以3小時24分完成賽事，冧莊成為男子全場總冠軍，佢表示過程中最困難嘅地方係要不停上斜同落斜，好蹝體力。對於一啲初次挑戰超馬嘅參加者，佢以過來人嘅身份建議大家應將重點放喺耐力同長距離訓練，要循序漸進，堅持每星期進行帶氧訓練，如30 – 40分鐘嘅慢跑，而當中最少要有一次係30 – 45km嘅長距離慢跑。今屆超馬除咗個人賽之外，亦設有4個界別嘅團隊接力賽，包括企業、社會服務、新世代及扶輪社，令到唔同能力嘅朋友仔，都能夠投入呢項全港盛事。此外，大會仲準備咗「扶輪嘉年華」去慰勞一班參賽者，有表演睇又有歌聽，保證大家盡興而歸。

扶輪香港超級馬拉松2017
日期：2017年3月5日
地點：中環龍和道
詳情及報名方法：http://www.rotaryhkum.com/

扶輪嘉年華
日期：2017年3月5日
時間：11:00am – 5:00pm
地點：中環龍和道

Comments

comments

Powered by Facebook Comments