agnès b. Eyewear Pop-up Store X 藝術展

上星期五，盧凱彤(Ellen)現身喺agnès b. Eyewear Pop-up Store，除咗作為開幕嘉賓之外，佢仲有個好特別嘅身份，就係幫agnès b.有份搞嘅藝術創作活動擔任評審。

有才華嘅人又點可以被埋沒？講緊嘅係一班賽馬會體藝中學嘅學生，早前agnès b. Eyewear就邀請咗佢哋為眼鏡盒進行設計，並喺Pop-up Store開幕當日搵嚟歌手盧凱彤頒獎畀得獎者，而所有作品亦都會作公開展出，等大家有機會可以欣賞到學生們天馬行空嘅創意。

今次比賽以海洋及agnès b.眼鏡為題，參加者嘅水準十分之高，Ellen最後揀咗呢三幅設計為冠亞季作品。

冠軍作品嘅靈感嚟自魔鬼魚，設計者陳同學覺得魔鬼魚嘅外型非常特別，有別於一般嘅魚類，有著獨特嘅氣場。背景運用咗比較夢幻嘅色彩，希望可以畀到人開心、舒服嘅感覺，而一群魔鬼魚向前游亦象徵住向夢想進發。

以下分別係亞軍及季軍嘅作品：

agnès b. Eyewear Pop-up Store除咗係一個小型嘅藝術展覽之外，嚟到呢到仲可以發掘到最新2017春夏系列嘅眼鏡，包括多款纖巧輕盈，著重外型線條設計嘅光學眼鏡及經典時尚嘅太陽眼鏡。

眾多眼鏡之中，盧凱彤最鍾意呢一副太陽眼鏡，防風嘅設計，再加上以鈦金屬物料製成，夠貼面之餘，亦都非常輕身，而且同Ellen當日嘅造型簡直襯到絕。

盧凱彤最近憑自資推出嘅專輯再次入圍台灣金曲獎，對於能夠得到大家高度嘅評價，佢感到相當鼓舞。由於專輯由投資、企劃到出品都係佢自己一個人負責晒，所以有好深嘅情意結，加上經歷完躁鬱症，對佢嚟講，呢張專輯可以話係一張更加私人，更加有力量嘅專輯，而且見證住佢嘅生命。

另外，對於有意將藝術作為職業嘅年青人，Ellen亦都寄語佢哋唔好畀商業上嘅考慮拖垮自己嘅創作力，要識得取捨，要知道嘜嘢先係最重要，更以佢自資出碟為例，當選擇咗要唱自己鍾意嘅作品嘅時候，就預咗有其他嘢需要犧牲，如金錢。

即將舉行一人一結他演唱會嘅Ellen，喺活動當日即席自彈自唱，令人聽出耳油。佢更透露尾場會有神秘嘉賓驚喜現身，相信fans們一定會好期待！

agnès b. Eyewear Pop-up Store
日期：即日至6月16日
地點：尖沙咀新港城中心OPTICAL 88

comments

PUFF.HK 流行食玩樂資訊媒體