PUFF.HK 流行食玩樂資訊媒體
話咁快嚟到年尾，又係手機品牌最後出擊嘅時候！噚日，華為宣布推出兩款全新旗艦手機 HUAWEI Mate 9及Mate 9 Pro，除咗處理器勁咗，速度快咗之外，品牌今次再度同Leica合作，用上黑白及彩色兩個鏡頭，影出嚟嘅黑白相特別有層次及細緻！
Mate 9機身輕巧纖薄，線條簡單俐落，1,920 x 1,080 IPS屏幕有5.9吋大，採用咗新一代Kirin 960八核心處理器，速度明顯快好多，平時手機太多相，一開相簿要load好耐，但Mate 9就完全無呢個問題，快到所有相一次過load好晒，打機同處理圖像方面亦都變得非常流暢。Mate 9嘅界面設計經過精簡，超過九成會用到嘅功能，基本上三步之內就可以完全操作得到，用起上嚟更直接。
今次所用到嘅Leica鏡頭係Mate 9其中一個好大嘅賣點，鏡頭有兩個，分別係一個2,000萬像素黑白鏡頭及另一個1,200萬像素彩色鏡頭，因為多咗個專用嘅鏡頭，所以影出嚟嘅黑白相特別多detail，細緻度特別高。雙鏡頭亦同時支援OIS光學防手震，再配合埋Hybrid Zoom雙攝變焦，有效減少拖影或模糊嘅情況，出到嚟嘅效果自然清晰好多，仲能夠拍埋4K影片，點影都得！
配備4,000mAh 特大容量電池，加上支援SuperCharge快速充電技術，只要充夠20分鐘電，就能夠用足一日，勁慳時間。
Mate 9有四種顏色可以揀，包括蒼穹灰、月光銀、香檳金及摩卡金色，由即日起於各大零售商及流動通訊服務供應商有售，售價為HK$4,780。
至於另一部Mate 9 Pro，規格基本上同Mate 9一樣，用咗相同嘅處理器及鏡頭配置，只係外型有啲唔同，換成5.5吋2K雙曲面屏幕，唔單止睇落更Slim，就連畫質都靚過Mate 9，而指紋制亦搬到機身前面，用落更就手方便。
有齊琥珀金及銀鑽灰色嘅Mate 9 Pro將於12月下旬推出，售價為HK$6,280。
Comments
Powered by Facebook Comments
