爆粗Band友上身？粉紅版蝙蝠俠你又見過未？

一向Cool到爆嘅蝙蝠俠，其實私底下，形象可以好百變好搞笑！為咗宣傳即將上映嘅《LEGO蝙蝠俠英雄傳》，蝙蝠俠今次決定豁出去，換上多個盞鬼造型，化身成爆粗Band友、迷人Pink Lady，又以鴨仔水泡look示人，務求令大家嚇一跳然後得啖笑，未睇戲先有驚喜！

電影仲未上映，蝙蝠俠已經忍唔住嚟到奧海城2期同大家見面，而且一嚟就嚟咗9個咁多，仲要係9個唔同造型嘅LEGO蝙蝠俠，有爆粗Band友上身嘅蝙蝠俠、有著到成身粉紅色嘅蝙蝠俠、有揸住咪扮明蝠俠嘅蝙蝠俠、有攬住鴨仔水泡嘅蝙蝠俠…款款都咁搞鬼咁趣緻，嚟到現場又點可以唔逐一集郵？

講到打卡，另外有一幅噴上咗唔同電影角色嘅塗鴉牆，又係好值得大家去影。同場亦都設有LEGO體驗區，只要喺指定時間內成功闖關，就可以嬴得禮物。此外，仲有期間限定嘅POP-UP STORE，Fans們可以買走多款同蝙蝠俠電影有關嘅LEGO，其中一款「阿卡漢瘋人院」嘅模型更係全港獨家限量發售，手快有手慢無！

《LEGO蝙蝠俠英雄傳》將於2月9號上映，大家記得要支持埋呢套電影！

 《LEGO®蝙蝠俠英雄傳》時裝SHOW及POP-UP STORE
日期: 即日起至2017年2月16日
時間: 12:00nn-9:00pm
地址: 奧海城2期地下主題中庭

Comments

comments

Powered by Facebook Comments