布甸醬麥樂雞咩玩法？日本麥當勞推布甸狗食品

食完朱古力南瓜醬薯條都未抹嘴，十月中，日本麥當勞又推出限定食品！不過今次官方專登玩神秘，事先表明會用布甸狗做主題，但就要網民從五款食品之中估下到底會出邊一款，唔知「布甸醬麥樂雞」你又想唔想試呢？

日本麥當勞宣布於10月14日推出布甸狗主題限定食品，並且在Twitter發起了投票，跟網民大玩「猜猜我是誰」遊戲，列出五款全新食品，當中有伏有唔伏，包括非常有諗頭的「布甸醬麥樂雞 」、「布甸漢堡」，以及比較大路的「布甸狗圖案漢堡包」、「焦糖布甸味麥旋風」等，到底結果會否令人有意外驚喜？就要等7/10揭曉最終答案先知。

１. 布甸狗圖案漢堡包

漢堡包表面印有得意布甸狗圖案，一共十款，十分可愛，叫人點忍心咬它一口？

２. 布甸醬麥樂雞

麥樂雞配布甸醬，味道又甜又鹹，好難想像得到會產生甚麼化學作用，直頭就是向舌尖上的味蕾挑機！

３. 焦糖布甸味麥旋風

五款食品之中，焦糖布甸味麥旋風算是最正路，布甸加雪糕好難會出事，所以推出機會最大，就連網民也是這樣估。

４. 焦糖味雞塊

食雞點止有雞味！在又熱又脆的雞塊撒上焦糖粉，味道完全提升至另一個層次。

５. 布甸漢堡

用得布甸狗做主題，又點少得原個布甸？這款漢堡直接用焦糖布甸做餡，夠晒進擊，個樣睇落幾靚，口感軟綿綿，到底跟漢堡可以有幾夾？

資料來源：日本麥當勞

Comments

comments

Powered by Facebook Comments