PUFF.HK 流行食玩樂資訊媒體
走出Note 7爆炸陰霾之後，Samsung強勢推出Galaxy S8及S8+，早前喺發布會上更重金禮聘搵嚟林海峰幫手做勢，除咗力谷兩部新機之外，同場仲預告流動支付服務Samsung Pay即將登港，睇嚟Samsung個勢依然係咁勁！
先講講S8同S8+嘅外型，兩部手機均採用超級幼身嘅邊框設計及雙曲面側屏幕，左右兩側近乎睇唔到框邊，加上取消咗實體HOME鍵，改為以壓力觸控，屏幕面積比上一代大大增加咗18%，分別有成5.8吋及6.2吋大，而最重要嘅一點係機身嘅體積依然保持纖細同輕巧，即使係單手都可以靈活操控。屏幕亦都用上咗18.5:9嘅全新顯示比例，畫面涵蓋嘅範圍變得更加豐富，配埋AKG專業調音技術所帶嚟嘅逼真立體音效，令用戶能夠盡享一流嘅視聽娛樂。
S8及S8+同樣內置咗智能助手Bixby，其中Bixby Vision能夠透過影像進行即時搜尋，從互聯網上找出相關嘅資訊。
不過講到方便，都唔及得呢個功能所支援嘅文字影像翻譯，去旅行睇唔明Menu都唔使驚，搵佢打救你就冇問題，而且Bixby Vision仲可以將圖片上嘅文字擷取成為文本再send畀人，唔使逐隻字打，真係慳返唔少時間，認真方便！另外，Bixby Home則提供咗一個非常個人化嘅管理頁面，用戶能夠從中快速開啟常用嘅App，而系統亦會根據使用嘅頻密程度嚟安排App嘅順序，務求緊貼用戶嘅需要。
至於效能方面，兩款手機都率先內置咗細小嘅10nm處理器，CPU同GPU嘅表現均被提高二十幾個%，處理工作抑或進行遊戲嗰陣，比以往都要流蜴，而且更加之慳電。S8及S8+前置鏡頭亦高達800萬像素，具備1.7特大光圈，加上支援Smart Auto Focus功能，能快速偵測及進行面部對焦。另外，手機更配備虹膜識別系統、IP68級防水防塵功能、支援高達256GB嘅microSD記憶卡及雙卡雙待，功能數之不盡。
同場加映仲有全新流動支付服務Samsung Pay，只要利用手機透過NFC或MST技術，就可以喺絕大部分提供刷卡支付嘅銷售點進行付款，過程簡單快捷，而且有多重保安技術保障，用戶甚至可以以虹膜確認身份，十分安全。
Galaxy S8有幻紫灰及楓木金兩種顏色選擇，售價為HK$5,698；Galaxy S8+則提供幻紫灰、星夜黑及珊瑚藍三種款式，售價為HK$6,398，另有6GB RAM+128GB ROM嘅版本選擇，價錢為HK$6,998，全部由5月25日起發售。
Comments
Powered by Facebook Comments
