HTC U Ultra試上手！新機二月中登場

HTC終於喺噚日舉行發布會，宣布全新旗艦手機U Ultra將於二月中正式登場，之前已經同大家介紹過呢款機，但到底有幾吸引？宜家就帶大家睇吓部機真實上到手係點嘅樣！

HTC U Ultra一出場，唔使講，最搶FO一定係佢嘅外型，今次唔再用金屬機身，改為用有水漾效果嘅3D曲面玻璃設計，光澤猶如湖水一樣咁明亮透徹，有齊黑、白、藍及粉紅4種顏色，以寶石藍最Sharp。

而最特別係機身顏色更會因唔同嘅光線而產生變化。喺室內嘅燈光照射下，機身呈現出較為深色嘅寶石藍。

但走到室外，喺猛烈陽光底下，機身卻透出好似湖面一樣嘅藍色。雖然外觀的確幾靚，不過就略嫌好痴手指模。

另外，U Ultra採用雙屏幕設計，5.7吋2K螢幕再加2吋副螢幕，透過副螢幕可以快速搵到聯絡人、開啟常用嘅App、播放音樂以及留意到天氣狀況。

1200萬像素嘅主鏡頭，備有OIS光學防手震及雷射對焦功能；而支援Ultra Pixel模式嘅前置鏡頭亦高達1600萬像素，就算環境昏暗，都可以拍攝到清晰嘅相片。

U Ultra取消咗3.5mm耳機孔，底部設有USB Type-C 插口，需要配合跟機嘅Type-C U Sonic耳機使用，耳機中嘅聲納探測功能能根據用戶嘅耳道，自動調整音色。

規格方面，新機配備Qualcomm Snapdragon 821處理器，內置4GB RAM及64GB 容量，電池容量有3,000mAh，以旗艦機嚟講，唔算係好強勁。

HTC U Ultra備有寶石藍、彩妝粉、亮麗黑及冰雪白4色，將於2月16日推出，售價為HK$5,698，現已接受訂購。

comments

PUFF.HK 流行食玩樂資訊媒體