結合AR技術！會講故事嘅微縮模型展？

奧海城將於今個農曆新年舉辦新春微型藝術展，除咗係香港史上最大型嘅一次之外，部分模型仲結合埋AR技術，透過生動嘅畫面，同大家分享關於香港嘅故事。

位置奧海城嘅微縮模型展有咩特別？有三大原因好值得大家去睇。

1.香港史上最大型
呢次展覽號稱係有史以來全港規模最大嘅微縮模型展，動用近二十位來自香港快樂微型藝術會嘅藝術家，展出作品多達五十二件，數量驚人，當中有部分曾經揚威中港台及海外，認真巴閉！而近三分一嘅模型更係專登為咗今次展覽而製作，或首次喺香港曝光，保證大家從未睇過。

2.屬於香港人嘅回憶
展覽中所睇到嘅係一個縮細版嘅香港，一幢幢嘅唐樓、碩果僅存嘅懷舊老舖、九龍寨城嘅光影、農曆新年時節嘅熱鬧情景……有啲可能係我哋已經遺忘咗，亦有啲可能係我哋平時無為意嘅，用另一種角度去睇，感覺會唔會唔同？呢次展覽正好讓我哋重新認識「香港」呢笪地方。

除咗展品富有香港本土特色之外，現場亦都佈置成舊式街道，掛上大大小小嘅霓虹招牌，《老金山貨店》及《揮春檔》更以真實比例呈現喺大家眼前，置身其中，甚有過年氣氛，夠晒應節。

3.揉合AR技術 不一樣嘅全新體驗
每件展品都由唔同嘅小件砌成，手工精緻，仿真度極高，絕對稱得上為藝術品，不過最厲害嘅唔止咁，某部分重點模型仲特別加入咗AR技術，透過手機或智能眼鏡就可以欣賞到動態效果，包括《利東街》中嘅迷你舞獅精彩表演及《林村許願樹》中人們拋擲寶牒嘅盛況等，唔同嘅模型都有屬於佢哋自己嘅故事，非常有趣。

喜．細 看香港　新春微型藝術展@奧海城
日期： 2018年1月26日至2月22日 (《但願人長久》將展出至3月4日)
時間： 中午十二時至晚上九時
地點： 奧海城2期地下主題中庭
費用： 免費

Comments

comments

Powered by Facebook Comments