CASIO出粉盒？自拍神器TR-M11玩味十足

差啲仲以為CASIO撈埋入化妝品界，學人出粉盒，但原來呢個造型咁別緻嘅粉盒，實情係CASIO最新推出嘅自拍神器 TR-M11，可愛到咁，女士們見到真係好難唔被打敗！

CASIO推出新一代自拍神器 TR-M11，今次嘅款式同以往嘅有好大分別，貝殼式嘅開合設計，加上外型的的骰骰，非常可愛，除咗多咗幾分玩味之外，仲可以保護鏡頭及顯示屏免被刮花。

內置嶄新嘅打燈系統亦都係TR-M11嘅賣點之一，系統配備咗獨特嘅環形補光燈設計，設有九盞LED燈，其中八盞係圍繞鏡頭，另一盞輔助燈則位於於螢幕下方，合共能提供5種照明模式，可以做到嫩膚、瘦臉、加強立體感、亮眼等效果，加上附有11 種專屬美顏設定，能微調出多達 1,000 萬個美顏組合，除咗一般嘅調校膚色、平滑肌膚、去除黑眼圈等功能之外，最厲害嘅地方係可以去埋痣。

另外，TR-M11嘅屏幕特登採用正方形嘅設計，相片嘅Size係按照1:1嘅比例，影完相可以馬上上載到Instagram，cut都唔使cut，夠晒方便。為配合正方形屏幕，相機亦都設計出全新嘅操作介面，只要掃一掃屏幕就能控制到主要功能，而透過轉盤式功能表則能選擇美顏模式，簡單易用。

TR-M11一共有5種顏色選擇，包括白色、粉紅色、青蘋果色，及遲一步推出嘅鮮粉紅和粉紫色，售價為HK$3,980。

Comments

comments

Powered by Facebook Comments